بريدك يا بلد

بريدك يا بلد بهواك
من الميلاد
واشيلك في العيون اعياد
واكتب جوه في الاعماق
حروف اسمك
ودمي مداد
ودايما انت في الخاطر
وما بنساك
بريدك نسمه بتحرك
شراع المركب العابر
بريدك انتي حد الريد
وزي نور فجرك الباكر
وزي شمسك
وموج نيلك
وريحة وردك العاطر
ولما يمر عليك سحاب
يشكّل جوّك الماطر
مع ذكر المطر والنيل
يمر اسمك على الخاطر
مكانك جوه في الاعماق
وساكنة براك
بشوفك عالية فوق الموج
بتحضني نيلك الرايع
وهادية مسالمة عز الليل
تهدهدي بدرك الطالع
لكل الدنيا تهدي سلام
بياض قلبك
جميل ناصع
ومهما يطول علي سفر
وحاتك يا بلد في يوم
بجيك راجع
واحيّ رباك
بريدك يا بلد نسمه
ورقصة نخلة في واحة
واجيك من البعيد مشتاق
ووين يلقى الشقي الراحة
وتفتحي حضنك الدافي
وتضميني
وتعود لي روحي افراحة
وانسى الغربة يوم القاك
بريدك قبل ما العالم
يعرف الريف
بريدك من قبل"كيوبيد"
جمالك فاق جمال فينوس
فسبحان الذي سواك
ونيلك فات خمور" باخوس"
بانه حلال وخيره مديد
جبالك اعلى من " اولمب"
شامخة دوام
عزيزة ذراك
بريدك انتي يا بلدي
وبريد غاباتك الخضرة
واريد نيلك
واريد رملك
وحتى سماك

الله عليك يا عمده والله افتقدنا ابداعاتك والحمد لله المنتدي تاني حا يرجعنا لبعض والله أشتقنا لأيام زمان أيام كنا لا تفترق ولك التحية حبيبنا

يديك العافيه ..... ياعمده